Governu Rekoñese Bee mak Direitu ba Moris

"Ita tenke halo jestaun di’ak ba sistema bee iha rai laran, maibé kuandu ba jere bee sira ho di’ak mak sei laiha bee ne’ebé moos atu fornese ba komunidade ka konsumidór sira iha territóriu nasionál," deklara Visi Primeiru Ministru, Mariano Assanami Sabino liu husi nia diskursu hafoin halo diálogu ho Sosiedade Sivil sira iha City 8 Manleuana, Kuarta (25/09/2024).

Nia hatete, sistema bee iha rai laran mak sai direitu ba moris, tanba bee nee fornese ba ema, ba ai-horis no balada sira, tanba nee mak presiza halo jestaun di’ak ba bee ne’ebé iha, nune’e fó bee ho kondisaun seguru no saudavel.

Tanba haree katak, balada sira ne’ebé hetan moras, la’ós tanba hahán laiha, maibé kauza husi laiha balansu entre han no hemu bee ne’ebé seguru, tanba balada sira la’ós ba hemu bee ne’ebé fo’er maibé sira mós presiza bee ne’ebé konfortável ba nia saúde.

"Ita hamutuk ho entidade sira hotu, oinsá bele halo planu ida ne’ebé di’ak atu fó prioridade ba sistema bee ne’ebé iha rai laran, nune’e bele kondisaun di’ak, han di’ak ba ema, ai-horis sira, no balada sira atu moris ho saudavel," nia tenik.

Assanami dehan, asuntu atu ko’alia kona-ba sistema bee nee importante tebes, tanba bee mak sai direitu ema hotu nia moris, no presiza duni atu halo jestaun di’ak, tanba bee la’ós indivíduu, Grupu, partidu ida nian, maibé nee estadu nian, tenke dezenvolve ho di’ak ba ema hotu.

Iha sorin seluk, Diretór Asosiasaun HAK akresenta, bee nee direitu umanus, tanba nee presiza duni halo melloramentu ne’ebé di’ak ba jestaun bee iha Timor Leste, tanba bee mak fó protesaun saneamentu no inimigu ba ema hotu atu moris ho kondisaun saudavel. Tanba nee sistema bee moos nee importante tebes ba ema hotu, no sai nudár direitu ba moris, nune’e hanesan parte relevante sira tenke fó hanoin oinsá bele harii jestaun ne’ebé di’ak, dezenvolve setór bee nee sai sufisiente ba ema hotu atu konsumu ho di’ak.

"Ita fiar katak husi meiu sira ne’ebé iha atu loke hanoin públiku nian, nune’e oinsá iha koñesimentu di’ak ba sistema bee iha Timor Leste, atu kuidadu bee iha Timor Leste, atu fó moris di’ak, seguru no saudavel ba ema hotu," nia subliña. Tanba nee importante tebes atu entidade relevante sira halo diálogu, liu-liu diskute kona-ba preokupasaun sira nee, oinsá bele halo planu, atu investe advokasia ne’ebé integradu ba melloramentu sistema bee no ijiene iha territóriu nasionál.

 Tuir Country Director WaterAid, Justino da Silva katak, bee nee nudár baze fundamenta ba ema hotu, oinsá bele utiliza bee ho di’ak, hodi kondisionál ba nesesidade moris, tanba nee presiza duni atu kuidadu sistema bee iha TL.

Bee nee sai nesesidade diáriu ba ema hotu nia saúde, liu-liu problema malnutrisaun sira, hanesan iha Timor Leste kuaze 47.1%, tanba impaktu mós konsumu bee ne’ebé la saudavel, entaun presiza duni atu esforsu hamutuk halo planu ne’ebé di’ak, atu dezenvolve di’ak liu tan ba bee iha rai laran.

(EST 1) Fontes STL-MEDIA